Margarita Xhepa: Zonja që magjepsi breza të tërë

Margarita Xhepa, një nga aktoret më të mëdha të skenës shqiptare, u nda nga jeta në moshën 91-vjeçare, duke lënë pas një trashëgimi artistike të pasur. E njohur për interpretimet e saj të fuqishme dhe zërin e ngrohtë, Xhepa ishte një ikonë e teatrit dhe kinemasë shqiptare, e dashur nga publiku dhe e respektuar nga breza të tërë aktorësh.

Fëmijëria dhe rruga drejt aktrimit

E lindur më 2 prill 1934 në Lushnjë, Xhepa u rrit në një familje që përjetoi humbjen e nënës kur ajo ishte vetëm nëntë vjeç. Që në fëmijëri, ajo gjeti ngushëllim te poezia, duke zhvilluar një dashuri të hershme për artin. Një mësuese e inkurajoi t’i përkushtohej aktrimit dhe shumë shpejt, u bë e qartë që ajo kishte talent.

Asokohe, një mësues i dramës në Lushnjë kërkonte një vajzë të re për një rol të veçantë. Kur e pa Margaritën, me flokët e saj bionde dhe sytë blu, e zgjodhi menjëherë për rolin e një vajze të re ruse në një shfaqje teatrale. Shfaqja pati sukses, saqë u shfaq edhe në Fier dhe Berat, duke i dhënë aktores një shenjë që duhej të ndiqte karrierën në teatër.

Pas përfundimit të shkollës fillore, ajo aplikoi në Liceun Artistik të Tiranës në degën e Dramës. Këtu, filloi të formësojë stilin e veçantë të aktrimit, i cili do ta bënte më pas një nga aktoret më të njohura të vendit.

Rolet e fuqishme

Në një karrierë që përfshinte mbi 150 role teatrale dhe më shumë se 30 filma, Margarita Xhepa solli në jetë disa nga personazhet më të ndërlikuar dhe të paharrueshëm të dramaturgjisë shqiptare dhe botërore. Në skenën shqiptare, ajo spikati në role të tilla si Dafina në “Lumi i vdekur”, Filja në “Cuca e maleve”, Zonja Mëmë në “Kush e solli Doruntinën”, Shano në “Gjenerali i ushtrisë së vdekur” etj.

Ajo interpretoi gjithashtu personazhe nga letërsia botërore, duke intepretuar shkëlqyer Ofelinë te “Hamleti” (Shekspir), mbretëreshën Margaret tek “Rikardi III” (Shekspir) apo Dadon te “Elektra” (Sofokliu). Disa role të tjera nga dramaturgjia botërore që spikatën janë Lena tek “Xhaxha Vanja” (Çehov), Ana Andrejevna tek “Revizori” (Gogol), Ledi Milford tek “Luiza Miler” (Shiler) etj. Aftësia e saj për të përçuar emocione të ndërlikuara e bëri atë një ndër aktoret më të njohura të Teatrit Kombëtar për dekada.

Filmat që bënë histori

Në kinematografi, Xhepa interpretoi në filma që mbetën në kujtesën e publikut, si për shembull “Vitet e para” (Zyraka), “Dimri i fundit” (Shano), “Pylli i lirisë” (Nënë Katja), “Koncert në vitin 1936” (Eleni Jankollari), “Gjeneral gramafoni” (Zonja e Prefektit), “Apasionata” (nëna e Arturit), “Një djalë dhe një vajzë” (mësuese Kristina), “Rrethi i kujtesës” (Tefta) etj.

Po aq të pëlqyera qenë edhe disa nga rolet e saj në filmat post-komunizmit, si për shembull, “Ne dhe Lenini” (Beti), “Bolero në vilën e pleqve” (Firdus). Në vitin 1997, ajo interpretoi në filmin grek “Mirupafshim”, një vepër që fitoi Çmimin e Madh në Festivalin Ndërkombëtar të Filmit Mesdhetar në Selanik.

Jeta përtej skenës

Në vitin 1955, Xhepa u martua me Xhavit Xhepën, me të cilin ndau jetën deri në vdekjen e tij në vitin 1987. Nga kjo martesë, ajo pati dy fëmijë, Sokolin dhe aktorin e mirënjohur, Ndriçim Xhepa.

Pavarësisht famës së saj, Margarita Xhepa ruajti gjithmonë një qëndrim të thjeshtë dhe u qëndroi larg bujave mediatike.

Trashëgimia e një legjende

Margarita Xhepa është nderuar me titullin e lartë artistik, “Artiste e Popullit”, një dëshmi e ndikimit në kinematografinë shqiptare. Interpretimet e aktores do të vazhdojnë të jenë një burim frymëzimi për brezat e ardhshëm, ndërsa emri i saj do të mbetet gjithmonë një ikonë e kinemasë dhe teatrit. (Anabel)