A është Parashqevi Simaku gruaja e filmuar në New York? Familjarët: Kemi 5 vite që e kërkojmë, ka humbur. Gazetari: Largohet sa herë i flasin shqip

Një video e publikuar në kanalin më të ndjekur në New York  “Abc7”, e ripostuar nga mediat shqiptare, ku shfaqet një zonjë e cila dyshohet se është këngëtarja ikonë e muzikës shqiptare, Parashqevi Simaku, ka tronditur rrjetin.

Në video shihet një grua e cila përngjan shumë në zë dhe portret me Parashqevi Simakun, por ajo që ka ka bërë edhe më shumë habi është se shfaqet duke marrë ndihma nga një qendër vullnetare që japin çanta shpine me ndihma, kryesisht për nënat dhe fëmijët në nevojë.

Familjarët e këngëtares nga Kavaja kanë reguar në lidhje me këtë video ku shprehen se kanë vite që kanë humbur kontaktet më ikonën e muzikës shqiptare dhe nuk kanë asnjë informacion se ku ndodhet ajo.

Për Report TV, familjarët kanë folur ku shprehen se e konsidertojnë të humbur dhe se prej 5 vitesh ata po e kërkojnë.

“Familja ka vite që e kërkon, e konsiderojnë të humbur prej 5 vitesh që kemi humbur kontaktet me të. E divorcuar prej vitesh, burri ka kujdestarinë e djalit dhe ka vazhuar jetën.”

Video e publikuar nuk ka datë të saktë, do të thotë se nuk dihet se kur është xhiruar, por ajo që shton më shumë dyshime se bëhet fjalë për Parashqevi Simakun është emri në fillim të videos ku shkruhet “Simaku Nohfe”.

Pas kërkimit të emrit, rezultoi se ekziston një llogari në Facebook me këtë emër, dhe po është vetë këngëtarja pasi ajo ka ndarë fotografi aktuale të sajat, por edhe foto të vjetra në rini kur ishte e madhja Parashqevi Simaku. Pra, zonja në video është pikërisht Parashqevia jonë.

Ndërsa gazetari Blendi Fevziu, i cili ishte nga ata që shpërndau videon duke kërkuar ndihmë për identifikimin e saj, thotë se tashmë e ka konfirmuar që bëhet fjalë për këngëtaren shqiptare. Ai thotë se është në kontakt me avokatë dhe biznesmenë në SHBA për ta identifikuar dhe ndihmuar dhe shprehet se ajo largohet sa herë i afrohen persona të cilët i flasin në gjuhën shqipe.